Marcus Smart wala na'y COVID-19 coronavirus

CEBU, Philippines — Naa na sa'y maayong balita nga niabot alang sa kapin sa usa ka dosenang NBA players nga nataptan sa COVID-19.

Kini human gideklarar sa Massachusetts Department of Health nga si Marcus Smart sa Boston Celtics hingpit nang naka-rekober sa coronavirus.

Mismo si Smart ang mikompirmar niini sa iyang Twitter account.

Duha ka semana ang milabay, gipahibalo ni Smart pinaagi gihapon sa iyang Twitter nga nag-positibo siya sa COVID-19.

"I can't stress enough, practice your social distancing, and really keep yourself away from a large group of people," matud pa ni Smart sa kanhi niya mensahe sa bidyu.

"Wash your hands, and help protect yourself, and help protect others by protecting yourself."

Samtang sa pagsulat ning balita, upat ka NBA players na ang nangaayo sa maong makalisang nga sakit, apil na sila si Rudy Gobert ug Donovan Mitchell sa Utah Jazz ug Christian Wood sa Detroit Pistons.

Si Gobert maoy labing unang NBA player nga nag-positibo sa virus hinungdan sa pagkasuspenso sa liga.

Padayon pa karong nagpaalim gikan sa virus si Kevin Durant ug laing tulo ka Brooklyn Nets uban ang wala hinganli nga mga sakop sa Philadelphia 76ers, Denver Nuggets ug Los Angeles Lakers.