Dela Pisa misidlak sa Hungary
CEBU, Philippines — Ang Sugboanong gymnast nga si Daniela Reggie De La Pisa mipakita na sab sa iyang abilidad aron paghakot og upat ka golds medals ug tulo ka bronze sa 2020 Tavazsi Kupa didto sa Budapest, Hungary ning bag-o lang.
Si De La Pisa nga mitunol og bulawang medalya sa Pilipinas niadtong 30th Southeast Asian (SEA) Games sa miaging tuig, mibira og golds sa ribbon, clubs ug balls apparatus ug ingon man sa individual all-around sa FIG senior division.
Nagparamdam sab ang teammate ni De La Pisa nga si Breanna Labadan uban ang tulo ka bronze sa junior division.
Ang 16-anyos nga major awardee sa 37th SAC-SMB All-Cebu Sports Awards ug usa sa PSA Sports Award's Milo Junior Athletes of the Year, usa na karon nga permanenteng resident visa holder sa Hungary.
Sa pagka karon, si De La Pisa wala pa makadesidir kon ipadayon ba ang iyang pagtungha didto sa Hungary o mobalik dinhi sa nasud alang sa sunod nga school year.
Buot ni De la Pisa nga bairon pa ang iyang abilidad ug palambuon ang iyang karera sa tinguha nga kab-uton ang iyang damgo nga makasalmot sa Olympics ugma damlag.
- Latest
