Gobert gidetalye ang epekto sa coronavirus

CEBU, Philippines — Si Utah Jazz center Rudy Gobert, kansang pagka-positibo sa coronavirus nakapuwersa sa pagsuspenso sa NBA  nagkanayon nga nawad-an siya og abilidad nga makapanimaho tungod sa virus.

Sa iyang social media post, ang 27-anyos nga higante gikan sa France nagkanayon nga maayo na ang iyang paminaw, apan kagahapon mi-tweet nga iyang nasinati ang wala kaayo mahibaw-i nga sintomas sa maong sakit.

Nagkanayon si Gobert nga sa miaging upat na ka adlaw, nawad-an siya og abilidad nga makapanimaho. Kon dunay tilawan, dili sab siya makadeterminar kon unsay lami niini.

"Just to give you guys an update, loss of smell and taste is definitely one of the symptoms, haven’t been able to smell anything for the last 4 days," suwat pa ni Gobert sa iyang Twitter. "Anyone experiencing the same thing?"

Kapin sa usa ka dosena na ka NBA players ang nag-positibo sa   COVID-19 apil na niini ang teammate ni Gobert nga si Donovan Mitchell, si Christian Wood sa Detroit Pistons, Marcus Smart sa Boston Celtics  ug Kevin Durant sa Brooklyn Nets.

Duna pa'y laing tulo ka players sa Nets ug ingon man duha sa LA Lakers ang nagpositibo, apan wala nganli sa tagsa-tagsa nila ka mga koponan. Dunay sa Denver Nuggets, apan wala pa masayri kon kini player ba ug sakop sa ilang support staff.

Sa wala pa magpositibo, si Gobert daw sa nagbugal-bugal sa patakaran sa liga unsaon paglikay sa maong makamatay nga sakit.

Iyang gihikap ang tanang mikropono ug voice recorder nga gibutang sa lamesa atubangan kaniya atol sa usa ka press conference.

Duha ka adlaw ang milabay, nagpositibo siya sa COVID-19.

Nangayo na hinuon si Gobert og pasaylo sa iyang gibuhat ug mihatag na og pinansiyal nga hinabang ngadto sa mga naapektohan ning makalisang nga katalagman nga mikutlo na og liboan ka mga kinabuhi tibuok kalibotan.