Didal mi-atras sa Asian Championship

CEBU, Philippines — Ang Sugbuanong skateboard sensation nga si Margielyn Didal mi-atras sa iyang partisipayon sa 2020 Millenial Asian Skateboarding Championships didto sa Singapore karon untang semana aron maka-pokus siya sa mga dagkong event uban ang tinguha nga palig-onon ang iyang tsansa nga makatikang sa 2020 Tokyo Olympics.

Nakahukom ang team ni Didal nga ikansela ang iyang pagsalmot sa ASC aron dili maputol ang iyang training didto sa Amerika ug ingon man aron maluwas ang iyang kaugalingon sa coronavirus pandemic.

Bisan tuod og ang ASC usa ka Olympic qualifier, modalit lamang kini og gamay nga puntos kon itandi sa Street League Skateboarding World Tour didto sa Las Vegas ug sa Skate Battle didto Peru.

Apan ang duha ka events nga gikatakda unta sunod bulan gipangkansela gumikan sa COVID-19 outbreak.

Taliwala sa kanselasyon sa pipila ka mga Olympic qualifying events, nagpabilin nga hayag ang tsansa ni Didal nga makarepresenta sa Pilipinas sa Tokyo Olympics.

Kini kay si Didal, ang 2019 Athlete of the Year sa Sportswriters Association of Cebu, No.14 karon sa world rankings ug ang top 20 awtomatik nga maka-apil sa maong prestihiyosong torneyo nga mahitabo kausa lamang sud sa upat ka tuig.