Talisay kampiyon gihapon sa Gullas Cup

CEBU, Philippines — Nadasig sa mainit nga abiba sa nagdasok nilang fans,  gi-sweep sa Talisay City Aquastars ang Carcar City Lechoneros pinaagi sa 85-68 nga demolisyon sa Game-2 sa ilang "best-of-three" finals series aron pagpabiling kampiyon sa  Gullas Cup: Vision 2020 Cebu First District Under 21 Basketball Tournament niadtong Biyernes sa     gabii   didto sa Talisay City Sports Complex.

Si Rubino Singson maoy nangu sa Aquastars uban ang 15 puntos, 14 ka rebounds, duha ka assists ug tulo ka blocks hinungdan nga siya maoy gipasidunggan nga player of the game.

Apan ang iyang teammate nga si Keaton Clyde Taburnal maoy gibayaw nga Finals MVP. Mihipos siya og 14 puntos, upat ka rebounds, duha ka assists ug usa ka steal.

Mikisaw sab si Jhaylord Castro bitbit ang 15 puntosd uban ang tulo ka rebounds, duha ka assists ug usa ka steal  alang sa  Aquastars ubos sa pagtimon ni coach Rey Michael Gurrea.

Ang Aquastars naglabaw lamang og dos puntos human  sa   tulo ka kuwarter, apan nagmangtas sa katapusang hunat sa duwa diin sila milusad og makalisang nga ataki, 33-18 aron ilubong ang bisita nilang taga Carcar og 17 puntos.

Si Leonilo Marturillas mitapos uban ang 12 puntos, unom ka rebounds, duha ka assists ug upat ka steals alang sa Carcar. Sila si Jhevolks Navarra ug Rey Alfeche nagkumbinar og 21 puntos, 11 ka rebounds, upat ka steals, duha ka assists ug duha ka blocks, apan silang tanan nangahuyhoy ang abaga gumikan kay gihikawan sila sa korona sa Talisay sa ikaduhang sunod-sunod nga tuig.