Didal naka-bronze sa tampa pro skateboarding

CEBU, Philippines — Usa ka adlaw human siya gipasidunggan nga "Athlete of the Year" sa Sportwriters Association of Cebu (SAC), ang skateboard sensation nga si Margielyn Didal mikuha dayon og atensiyon human siya milabni og bronze medal sa Tampa Pro skateboarding competition kagahapon  didto sa Tampa skatepark sa Florida, United States.

Ang 20-anyos nga si Didal mipakita og impresibong salida gikan sa eliminasyon hangtod sa semifinals hinungdan nga nakasud siya sa final round.

Sa best-of-three run sa finals, si Didal miposte og 73.94 puntos nga igo kaayong nagtukmod kaniya ngadto sa ikatulong puwesto.

Ang mga pambato sa Japan nga sila si Hina Maeda ug Yumeka Oda maoy misilhig sa nag-unang duha ka dapit. Si Maeda mipatik og 87 puntos, samtang si Oda dunay 84.91 puntos.

Si Gabriela Mazetto sa Brazil maoy nalandig sa ikaupat nga dapit ug gisundan kini nilang Ana Rendon sa Colombia ug Samarria Brevard sa US.

Human sa una niyang torneyo ning tuiga, si Didal mokumbati sunod sa Singapore. Human niini, mobalik siya sa Amerika alang sa SLS World Tour didto sa Las Vegas nga parehong ipahigayon sud ning bulana isip kabahin sa iyang preparasyon alang sa laing Olympic qualifying event, ang World Skate Street and Skate Open didto sa Lima, Peru karong Abril 5.