Vanessa Bryant mopasaka og kaso

CEBU, Philippines — Hinay-hinay na nga gidawat sa biyudang si Vanessa Bryant ang kamatayon sa iyang bana nga si NBA legend Kobe Bryant ug  anak niini nga si Gianna.

Apan gipakita niya nga seryoso siya nga panubagon ang tag-iya sa helicopter company nga maoy gibasol niya sa trahedya nga pagkahagsa sa helicopter nga mikalas og laing pito ka kinabuhi.

Dungan sa gihimong memorial day alang nilang Kobe ug Gianna, si Vanessa midangop ngadto sa Los Angeles Superior Court aron mopasaka og kaso ngadto sa Island Express Helicopters Inc. nga maoy tag-iya sa nahagsa nga helicopter diin luwan ang mag-amahang Bryant ug laing pito.

Usa usab sa gibasol ni Vanessa ang piloto nga si Ara Zobayan dihang mipugos og lupad bisan pa og gitambagan na sa aviation sa Los Angeles nga dili una  molarga tungod sa bati nga panahon. Apil si Zobayan sa nakalas sa maong insidente.

Dugang ni Vanessa  nga naguol kaayo siya sa    kamatayon sa iyang bana ug anak, apan mipasalig siya sa ilang mga higala ug kapamilya nga magpabiling lig-on alang sa tulo ka nahibiling anak nila ni Kobe nga sila si Natalia, Bianka ug Capri.