Parks wala pa'y klaro moduwa batok Thailand

CEBU, Philippines – Delikadong dili makaduwa si Ray Parks Jr. sa Gilas Pilipinas batok sa Thailand sa FIBA Asia Cup qualifiers karong Pebrero 20.

Kini human ang Fil-American nga si Parks Jr. posibleng moatras sa pagduwa kay gihapsay pa niini ang iyang kontrata uban sa TNT KaTropa. Sa pagka karon,  nagpaabot pa ang TNT sa katapusang tubag ni Parks ug dawaton ba niini ang gitanyag nila nga contract extension.

Si Parks mipirma lang og one-conference contract sa miaging season sa TNT human kini makadesidir nga mobiya sa Blackwater Elite.

Ang TNT gusto mohatag og multiple-year contract sa kanhi ABL MVP, apan wala pa'y  final decision ang kampo niini.

Nanghinaut si Parks nga makasabot ang mga kadagkoan sa Gilas kon ugaling dili siya moduwa uban kanila, apan paningkamuton niya nga mahapsay kini aron mahatagan niya og panahon ang national team.

Unang miatras sa pagduwa sa Gilas ni coach Mark Dickel mao si Fila-German Christian Standhardinger, Japeth Aguilar ug Mac Belo  tungod sa managlahing rason.