James naging emosyunal sa tribute para kay Bryant
LOS ANGELES -- Isang maluha-luhang LeBron James ang nagsalita sa Staples Center crowd sa loob ng apat na minuto bago labanan ng kanyang Lakers ang bisitang Portland Trail Blazers.
Binasa ni James ang pangalan ng siyam na biktima, kabilang sina Kobe Bryant at anak nitong si Gianna, sa helicopter crash noong nakaraang Linggo.
Matapos ito ay itinapon ni James sa sahig ang papel para sa kanyang inihandang talumpati at sinabing “go straight from the heart.”
“I know at some point we will have a memorial for Kobe,” wika ni James, umiyak nang kantahin ng bandang Boyz II Men ang national anthem bago siya nagsalita. “But I look at this as a celebration tonight.”
“The one thing that we always shared was that determination to just always want to win and just want to be great,. The fact that I’m here now means so much to me. I want to continue along with my teammates, to continue his legacy, not only for this year, but for as long as we can play the game of basketball that we love because that’s what Kobe Bryant would want,” dagdag pa nito.
Lalo pa itong nagdulot ng emosyon sa nasabing pregame ceremony na nagtampok din sa kinantang “Amazing Grace” ni music artist Usher.
Nagsigawan ang mga fans ng “M-V-P, M-V-P” para kay Bryant kasunod ang “Gi-gi, Gi-gi” para kay Gianna.
Ipinakilala ni Lakers public-address announcer Lawrence Tanter ang limang miyembro ng starting lineup ng Lakers sa pamamagitan ng “No. 24, 6-6, 20th year, from Lower Merion High School, Kooobee Bryant.”
Inilagay ang mga jersey nina Bryant (No. 24) at Gianna (No. 2) sa kanilang mga silyang inupuan halos isang buwan matapos manood sa Staples Center.
Samantala, tinalo ng Blazers ang Lakers, 127-119, sa likod ng 48 points ni Damian Lillard.
Tumapos si James na may 22 points, 10 assists at 8 rebounds at kumolekta si Anthony Davis ng 37 points at 15 boards para sa Lakers.
Sa Milwaukee, nagtala si Will Barton ng 24 points para akayin ang Denver Nuggets sa 127-115 pananaig sa Bucks.
Nagdagdag si Malik Beasley ng 16 points para sa Nuggets kasunod ang tig-15 markers nina Nikola Jokic at Michael Porter Jr.
Nagtala si Giannis Antetokounmpo ng 31 points para sa Bucks.
Sa Houston, kumamada si James Harden ng 35 points at may 32 markers si Russell Westbrook para sa 128-121 panalo ng Rockets sa Dallas Mavericks.
- Latest
