Juntilla, Nalos 'bida sa Bataan

CEBU, Philippines — Ang mga Sugboanong sila si Reed Friar Juntilla ug Joseph Airo Nalos maoy mibida sa  1Bataan-Camaya Coast Riders  dihang ilang gipakuratan ang  Manila-Frontrow,  77-76  sa 2019-20 Chooks-to-Go MPBL Lakan Season niadtong Huwebes sa gabii didto sa Angeles University Foundation (AUF) gym sa Angeles, Pampanga.

Si Juntilla, kanhi bitoon sa University of the Visayas (UV) Green Lancers, miiskor og 15 puntos, samtang si Nalos, usa ka All-Star guard sa dihang nagduwa pa siya sa Southwestern University (SWU)-Phinma Cobras, mikolekta og 11 puntos aron tabangan ang Bataan nga motikang sa ikalimang dapit sa North Division standings bitbit ang 16-9 win-loss record.

Giagak ni Nalos ang Bataan batok sa Manila nga naglangkob ni Mark Jayven Tallo, ang sikat niyang teammate sa dihang ilang gitimon ang SWU Cobras ngadto sa kampiyonato sa Cebu Schools Athletic Foundation, Inc. (CESAFI) niadtong 2012 season.

Si Tallo nga nakapakita'g aksiyon sa PBA sa wala pa manaog sa commercial league nga gitukod ni Manny Pacquiao duha ka tuig ang milabay, naangklahan ngadto lamang sa dos puntos.