Porter nag-wild
CEBU, Philippines — Nagmangtas ang rookie nga si Michael Porter Jr. ug mikadlit og career-high 25 puntos aron pangulohan ang Denver Nuggets nga mipakaging sa Indiana Pacers sa iskor 124-116 sa NBA kagahapon didto sa Banker's Field House sa Indianapolis, Indiana.
Hait kaayo ang tirada ni Porter kay kausa lamang siya masipyat sa 12 niya ka itsa.
"I felt really comfortable out there," matud pa ni Porter. "It's amazing to start the year like this.
It's an amazing feeling and I have my teammates and coaches to thank."
Ang Pacers miposte og 14 puntos nga labaw sa nahibilin nga 5:23 sa unang kuwarter, apan miresbak ang Nuggets hinungdan nga mao na kini ang naglabaw, 92-88 human sa tulo ka kuwarter.
Giablihan sa Denver ang katapusang 10 minutos sa aksiyon pinaagi sa 11-6 run ug wala na makarekober pa sukad niadto ang Pacers.
Gawas ni Porter, dako sab og natabang si Nikola Jokic nga mihipos og 20 puntos alang sa Nuggets bisan og na-foul trouble.
Sa laing duwa, ang Miami Heat milusad sa ilang kampanya sa 2020 pinaagi sa pagpukan sa Toronto Raptors sa iskor nga 84-76.
Si Bam Adebayo maoy nangu sa Heat uban ang 15 puntos ug 14 ka rebounds.
Ang Raptors padayong nagkagidlay nga wala ang duha ka bitoon nilang sila si Marc Gasol ug Pascal Siakam.
Sa uban pang mga resulta, si Rudy Gobert mitimbre og 17 puntos ug 12 ka rebounds sa dihang nakaipsot ang Utah Jazz batok sa Chicago Bulls sa iskor nga 102-98, samtang si Luka Doncic mitagak og 15 sa iyang 31 puntos sa katapusang kuwarter sa dihang gilubong sa Dallas Mavericks ang Brooklyn Nets sa iskor nga 123-111.
- Latest
