David Stern mipanaw na

CEBU, Philippines — Si David Stern, ang utok sa dili hitupngang paglambo sa NBA samtang siya maoy nagsilbe isip commissioner gikan niadtong 1984 hangtod sa 2014, mitaliwan na ngadto sa laing kalibotan kagahapong. Nag-edad siya og 77.

Ang NBA, kansang championship games wala pa masibya sa telebisyon nga live didto sa Amerika dihang nagsugod ang 30 ka tuig nga mandato ni Stern, maoy mipahibalo sa subo nga balita nga nagikan mismo sa pamilya ni Stern sa iyang kiliran.

Na-ospital si Stern human mikolapso sud sa usa ka restaurant didto sa New York niadtong Disyembre 12. Dali siya nga gioperahan gumikan sa pagdugo sa iyang utok, apan wala na makarekober pa.

Atol sa iyang pagretiro niadtong Pebrero 1, 2014 ug gipasa ang liderato sa liga ngadto ni Adam Silver, ang NBA usa na ka malampusong liga nga misulbong ngadto sa tumang pagkasikat sa nagkadaiyang suok sa kalibotan partikular na sa China, Europe, Africa ug hasta gani sa India.

"Because of David, the NBA is a truly global brand -– making him not only one of the greatest sports commissioners of all time but also one of the most influential business leaders of his generation," sumala pa ni Silver sa usa ka opisyal nga pamahayag.

Apil sa mga dalaygon nga nabuhat ni Stern mao ang pagtubo sa liga gikan sa 23 ngadto sa 30 teams. Ubos sa iyang paggiya, natawo ang pito ka expansion teams sama sa Charlotte Hornets, Miami Heat, Orlando Magic, Minnesota Timberwolves, Toronto Raptors, Vancouver Grizzlies (nga nahimong Memphis) ug New Orleans Pelicans.

Ubos sa iyang pagtimon, ang mga aktibong NBA players napakita'g aksiyon sa Olympics sa labing unang higayon. 

Gani ang 1992 US Olympic "Dream Team" nga gibidahan og mga NBA superstars misidlak sa Barcelona Games hinungdan nga ang NBA nakapasol og minilyon ka fans sa kalibutanhong bantawan.

Kabilin sab ni Stern mao ang pagtubo sa average nga suholan sa mga NBA players gikan sa $200,000 ngadto sa $7.7 million matag tuig.

"The entire basketball community is heartbroken," matud pa sa National Basketball Players Association. "David Stern earned and deserved inclusion in our land of giants."