Ja Morant sa Grizzlies labing init nga rookie

CEBU, Philippines — Si Ja Morant sa Memphis Grizzlies mao karon ang nag-una sa karera pagka-'Rookie of the Year' ning NBA season.

Human sa walo ka semana nga aksiyon, si Morant maoy nangu sa tanang rookies uban ang average nga 19.1 points ug 6.6 assists matag duwa.

Sa mga NBA players, ikaunom siya sa labing mangtas sa katapusang kuwarter diin siya mipatak og 8.5 puntos matag duwa. Nagsunod siya sa dekalibreng mga pangan nga gilangkuban nilang James Harden sa Houston Rockets, Kawhi Leonard sa LA Clippers, Damian Lillard sa Portland Trail Blazers, Bradley Beal sa Washington Wizards ug Giannis Antetokounmpo sa Milwaukee Bucks.

Nagbarog ikaduha sa listahan sa labing hait nga rookie mao si Tyler Herro sa Miami Heat.

Si Herro mi-avarage og 17.3 puntos matag duwa hinungdan nga mitikang kini og tulo ka ang-ang gikan sa ikalima niining puwesto sa miaging semana.

Ang teammate ni Herro nga si Kendrick Nunn nanaog ngadto sa ikatulo gikan sa ikaduha, samtang si Eric Paschall sa Golden State Warriors maoy ikaupat ug si RJ Barrett sa New York Knicks ikalima.

Lain pang mga lig-ong kandidato pagka-ROY mao sila si Brandon Clarke sa Memphis Grizzlies, DeAndre Hunter sa Atlanta Hawks, Ky Bowman sa Golden State Warriors,  Coby White sa Chicago Bulls ug  PJ Washington sa Charlotte Hornets.