PBA Legends, UV Lancers magsangka na sa Danao

CEBU, Philippines — Ang mga basketball fans sa amihanang bahin sa Sugbo makasaksi og talagsaong pasundayag sud sa korte gumikan kay ang PBA Legends nga gilangkuban og kanhi ug mga aktibong pro players, makigduwa batok sa University of the Visayas (UV) Green Lancers sa usa ka exhibition match karong alas-9 sa gabii didto sa Danao City Sports and Civic Center.

Bisan og wala si Gary 'El Granada' David gumikan kay nagpaalim pa sa iyang angol, eksplosibo gikan ang linyada sa PBA Legends gumikan sa presensiya nilang John Ferriols, Willie Miller, Lordy Tugade ug Sunday Salvacion nga pulos nakatagamtam og kampiyonato sa mabulokon nilang karera sa PBA.

Moduwa sila uban sa aktibong mga PBA players nga sila si Paul Desiderio, Brian Heruela ug Mac Belo sa Blackwater Elite ug mga collegiate standouts nga sila si Jessie Aloro, JC Escalona ug John Jabonete sa Cebu Institute of Technology-University (CIT-U) Wildcats.

Sa dili pa ang ilang duwa, magsangka una ang San Remigio Properties ni team owner Mark Anthony Ynoc ug Kiboy's Computer Solutions (KCS) ni Ricky Verdida sa alas-7:30 sa gabii.

Ang mga tiket nagkantidad og P100 sa upper box, P200 sa lower box ug P250 sa VIP section.

Ang kumbati sa PBA Legends gituyo aron pagdugang og lamas sa Chauncey Open Basketball League 2019 nga gikatakdang mosikad karong Martes, Nobiyembre 26, didto sa Mayor Panphil B. Frasco Sports Memorial Complex sa Liloan, Cebu.

Gawas sa SanRem Properties ug KCS, lain pang mopakita'g og aksiyon sa tulo ka semana nga torneyo nga giorganisar ni Tyrone Anthony Bayle mao ang KCS 2.0, Bogo LGU ubos ni Mayor Carlo Martinez, Fighter 50, Sumisetu Philippines, Inc. (SPI), Kyrie Dave ug Aguila ng Lapu-Lapu City nilang  Vince Chan Carungay ug Chris Bucana.