Compostela NHS naghari sa NBTC-North Cebu leg

CEBU, Philippines — Gibuntog sa Compostela National High School ang ilang mga karibal gikan sa Carmen NHS pinaagi sa 78-69 nga desisyon sa tagakay nilang kampiyonato aron sakmiton ang titulo sa labing unang Northern Cebu leg sa 13th Chooks-to-Go SM National Basketball Training Center (NBTC) League niadtong Domingo didto sa D.M. Reynes gymnasium sa Compostela, Cebu.

Ang Compostela miabante sa finals human gilampaso sa Lataban NHS sa Liloan, 96-69, samtang ang Carmen NHS miangkon sa laing luna sa kampiyonato human gipatikyaob ang Rosemont Hills Montessori College, 89-60.

Sa ilang engkuwentro batok sa Carmen, kontrolado kaayo sa Compostela ang duwa ug wala na sila molingi pa sukad miabante, 18-11 sa  first period.

Nakasustinir ang Compostela sa ilang kainit sa ikaduhang kuwarter aron pagposte niini og 13 puntos nga bentaha sa halftime, 36-23. Wala na makabawi pa sukad niadto ang Carmen.

Si John Michael Pilapil nga maoy gibayaw nga Most Outstanding Player sa SM NBTC-Northern Cebu, maoy nangu sa Compostela uban ang 14 puntos ug gisundan kini ni Joseph Wagas nga mitali og 12 puntos.

Gumikan sa ilang pagdominar sa lima ka adlaw nga torneyo nga gipaluyohan, ang Compostela NHS maoy morepresentar sa Northern Cebu sa SM NBTC League Regional Finals sunod tuig didto sa Bohol.

Ang liga nagmalampuson ubos sa superbisyon ni commissioner Ruben 'Junjun' Nelmida Patotoy Jr. inabagan nilang Prospero Lahoylahoy Jr., Nars Canoog, Jhanyl Arcenio ug tanang coaches sa mga partisipanteng koponan.