UV pabiling hari sa SBP Visayas Regional Finals

CEBU, Philippines — Nagsilbe nga bayani si Neil John Bernante kinsa mipasud sa iyang tres sa katapusang kwatro segundos aron ihatud ang kampiyonato sa University of the Visayas batok sa St. John’s Institute of Bacolod, 40-35, sa SBP division sa Visayas Regional Finals sa 34th SBP Passerelle Twin Tournament kagahapon didto sa Ilo-ilo City.

Kini ang ikaduhang sunod-sunod nga kampiyon sa UV sa SBP.

Tabla ang duwa ug nagbinayloay og puntos ang duha ka koponan nga miresulta sa 35-35 nga panagtabla. Hinuon, nakakita og bangag sa depensa sa St.John si Bernante ug daling mitugpo sa iyang tres nga maoy nakapadaog sa iyang koponan.

Si John Bual maoy leading scorer sa UV sa iyang 13 puntos, samtang sila si Bernante ug John Baring mitampo og sayes puntos matag usa. Nangulo sa St. John si Karl John Agravante nga adunay 13 puntos.

Sa maong kadaugan, ang UV maoy morepresentar sa rehiyon sa national finals nga ipahigayon karong Nobiyembre 23 ug 24 didto sa Roxas City.

Sa ilang bahin, wala hinuon gisuwerte ang Sacred Heart School-Ateneo de Cebu human sila mapukan sa HERCOR College, 68-88 sa finals sa Passerelle division.

Mirapido og 23 puntos si Michael Asoro, apan dili kini igo aron ihatud sa kadaugan ang SHS-Ateneo. Si Jared Bahay mitampo og 14 puntos.

Nangulo sa HERCOR si Joshua Mainar nga adunay 19 puntos.

Sa battle-for-third, ang Hua Siong College sa Ilo-ilo midaog batok Colegio de la Purisima Concepcion of Roxas, 46-39, samtang ang University of St. La Salle- Bacolod maoy ikatulo sa Passerelle human gilatos ang St. Robert’s International Academy sa Iloilo, 63-53.