Player sa Heat gisuspenso, gahithit marijuana
CEBU, Philippines — Ang reserve guard sa Miami Heat nga si Dion Waiters gisuspenso og 10 ka duwa nga way bayad gumikan sa binuhatan niini nga makadaut sa interes sa ilang koponan.
Nagsugod ang suspensiyon ni Waiters niadtong Biyernes atol sa ilang kapildihan sa Miami Heat.
Dili pa siya makapakitag aksiyon hangtud karong Disiyembre 1 diin sangkaon sa Heat ang Brooklyn Nets didto sa New York.
Ang 27-anyos nga si Waiters, nga mipirma og upat ka tuig nga kontrata sa Heat nga mibalor og $52 million niadtong 2017, gikataho nga nasakpan nga naghithit og marijuana sud sa pribadong abyon sa Heat samtang sila nagbiyahe gikan sa Phoenix padung sa Los Angeles.
Gihulagway sa Heat nga ‘makalisang’ ang aksiyon ni Waiters.
“We are very disappointed in Dion’s actions this season that include the very scary situation on Thursday night, and grateful that the outcome wasn’t worse,” sigun pa sa Heat sa opisyal niining pamahayag.
Si Waiters, nga maoy No.4 overall pick niadtong 2012 NBA Draft, mi-average og 13.2 puntos, 2.7 rebounds ug 2.8 assists sud sa 409 ka duwa nga naglangkob og walo ka seasons uban sa Cleveland Cavaliers, Oklahoma City Thunder ug Heat.
- Latest
