Cobras ug Webmasters magbugno sa no.1 spot

CEBU, Philippines — Ang Southwestern University (SWU)-Phinma Cobras ug University of Cebu (UC) Webmasters magpinaksitay alang sa No.1 spot sa seniors division pagtak-op sa eliminasyon sa 19th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum,.

Sa kasamtangan, ang Southwestern U naghari sa liderato bitbit ang 9-2 win-loss record, apan ang Webmasters nga lab-as pang mipakaging sa Cebu Institute of Technology-University (CIT-U) Wildcats, 81-72 nagsikit kanila uban ang 8-3 nga baraha.

Atol sa ilang engkuwentro sa unang hugna niadtong Septiyembre 1, ang Cobras mibihag sa Webmasters sa iskor nga  66-58. Kini nagpasabot nga ang UC kinahanglan nga mopilde sa SWU-Phinma sa alas-4:30 sa hapon nilang sangka og dili momenos sa nuybes puntos aron sila maoy molugwa nga topseed paingon ngadto sa semifinals.

Bisan unsa pa hinuon ang resulta, ang Cobras ug Webmasters segurado nang dunay twice-to-beat advantage sa Final Four.

Sa laing mga duwa sa collegiate division, ang three-time defending champion University of the Visayas (UV) Green Lancers makigtigi sa University of San Jose-Recoletos (USJ-R) Jaguars sa alas-6 sa gabii, samtang ang CIT-U Wildcats ug ang University of Southern Philippines Foundation (USPF) Panthers mag-abot sa alas-3 sa hapon.

Uban ang 7-4 nga marka, ang Lancers segurado nang motapos isip No. 3 seed labaw og usa ka gintang sa 7-5 nga University of San Carlos (USC) Warriors, samtang ang Panthers (3-8), Wildcats (3-8) ug Jaguars (2-9) pulos nangatagak na.

Sa juniors division, ang Sacred Heart School-Ateneo de Cebu (SHS-AdC) Magis Eagles mosuway pagpabuhi sa ilang kampanya nga birahon ang numero unong luna sa dihang ilang harungon ang UC Baby Webmasters sa ala- 1:30 sa hapon, samtang ang Cebu Eastern College (CEC) Dragons ug USJ-R Baby Jaguars magsangka sa usa ka non-bearing match sa alas-12 sa udto.

Ang Magis Eagles mipabakwit sa Baby Jaguars, 69-54 niadtong Huwebes sa gabii aron pagsilyo sa ilang luna sa semis bitbit ang 7-2 nga marka nga gipatung-an sa 8-1 Baby Webmasters ug 8-2 UV Baby Lancers.

Duna pa hinuo'y tsansa ang Magis Eagles aron angkunon ang No.1 seed kon ugaling ilang patikyaubon ang Baby Webmasters.