Webmasters gustong mosakmit sa no. 2 spot

CEBU, Philippines – Ang University of Cebu (UC) Webmasters magsagubang og mahinungdanong misyon sa ilang pakigharong batok sa Cebu Institute of Technology-University (CIT-U) Wildcats sa 19th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.

Kon ugaling ilang mapilde ang Wildcats sa ilang engkuwentro sa alas-6:45 sa gabii, segurado nang maangkon sa Webmasters ang No. 2 spot nga makahatag kanila og twice-to-beat advantage sa semifinal round sunod semana.

Sa pagka karon, ang Webmasters nahimutang sa ikaduhang dapit sa seniors division standings uban ang 7-2 win-loss record sunod sa topseed nga Southwestern University (SWU)-Phinma Cobras (9-2).

Nanginahanglan na lang karon ang Webmasters nga modaog og usa sa katapusan nilang duha ka mga duwa, ang lain batok sa Cobras karong Sabado  aron pormal nilang kubiton ang ikadunang luna.

Angayan hinuon nga magmatngon ang Webmasters gumikan kay ang Wildcats nagpanikad nga makapasol og laing dako nga isda human ilang gipakuratan ang University of San Carlos (USC) Warriors, 71-69, niadtong Oktubre 29.

Sa juniors division, ang Sacred Heart School-Ateneo de Cebu (SHS-AdC) Magis Eagles ug University of San Jose-Recoletos (USJ-R) Baby Jaguars mag-abot sa krusyal nga duwa sa alas- 5:15 sa hapon.

Ang Magis Eagles sa kasamtangan anaa sa ikaupat nga puwesto bitbit ang 6-2 nga baraha, samtang ang Baby Jaguars ikaunom uban ang 4-4 nga marka.

Kon molampus, ang Magis Eagles hingpit nang motikang sa Final Four. Apan angay sila mangandam sa usa ka dakong gubat kay tataw nga buhaton sa Baby Jaguars ang tanan kutob sa ilang mahimo kay sayod man sila nga kon mapilde hayan tagak na ug manamilit na sila sa liga.