Davis nagmangtas

CEBU, Philippines — Mihimo og franchise record si Anthony Davis human makapasud og 26 ka free throws atol sa kadaogan sa iyang koponan Los Angeles Lakers batok saMemphis Grizzlies, 120-91 sa NBA kagahapon didto sa Staples Center sa Los Angeles, California.

Sa kinatibuk-an, si Davis miiskor og 40 puntos ug milangkat og 20 ka rebounds aron pangulohan ang scoring sa Lakers.

Wala sab magpa-alkansi si LeBron James nga mibagnos og 23 puntos alang sa Lakers nga mitali sa ikatulo nilang sagunson nga daog.

Naglabaw unta ang Grizzlies, 65-59 sa nahabiling siyete minutos sa ikatulong kuwarter, apan kalit lang silang natikyaob human gilumsan og  27-2 run sa Lakers.

Si Ja Morant mihipos og 16 puntos, samtang si Jonas Valanciunas dunay 14 puntos ug 11 ka rebounds alang sa Grizzlies nga nakatilaw sa ikatulo nilang pilde sud sa upat ka duwa.

Sa laing aksiyon, si Jimmy Butler mitimbre og 21 puntos, samtang si Tyler Herro miayag og 29 puntos sa dihang gilat-an sa Miami Heat ang Atlanta Hawks, 112-97.

Dako sab og natampo sa Heat si Goran Dragic nga miiskor og 21 puntos ug ingon man sila si Bam Adebayo ug Kendrick Nunn nga parehong mirehistro og 17 puntos.

Mikulit sab og daog ang Dallas Mavericks human makaipsot batok sa Denver Nuggets, 107-106. 

Si Maxi Kleber mipupo og 14 puntos, pito ka rebounds ug usa ka krusyal nga block nga maoy nagsilyo sa makapaisag balahibo nilang kadaogan.

Sa kinatibuk-an, siyam ka players sa Dallas ang miposte og double figures, apil na si Luca Doncic nga dunay 12 puntos ug si Kristaps Porzingis nga mikamada og 10 puntos uban ang 14 ka rebounds.