UC sud sa final 4

Cebu, Philippines — Ang University of Cebu (UC) Webmasters miihaw sa University of Southern Philippines Foundation (USPF) Panthers, 79-62 aron pag-angkon og luna sa Final 4 sa 19th Cebu Schools Athletic Foundation, Inc. (CESAFI) men's basketball tournament diha sa Cebu Coliseum.

Bangis nga duwa ang giladlad ni Tosh Sesay diin kini mikolekta og 27 puntos, samtang impresibo sab si Darell Shane Menina nga mitimbre og 23 puntos alang sa Webmasters nga segurado nang moabante sa semifinals bisan og unsa pa ang resulta sa katapusan nilang duha ka duwa.

Ang Webmasters ug ang University of the Visayas (UV) Green Lancers nagtabla karon bitbit ang 6-3 win-loss records, apan ang UC mao ang dunay katungod sa ikatulong puwesto gumikan kay gisilhig man niini ang three-time defending champion sa duha ka hugna nga eliminasyon.

Bisan pa  niini, ang Webmasters ug ang Lancers magpadayon sa ilang tinguha nga makalandig  sa No. 2 spot sa ilang pakigsangka batok sa managlahing kaatbang karong adlawa.

Ang Webmasters makigtigi sa University of San Carlos (USC) Warriors sa main game sa alas-5 sa hapon, samtang ang Lancers makigharong sa Cebu Institute of Technology-University (CIT-U) Wildcats sa alas- 3:30 sa hapon.

Sa kasamtangan, ang Warriors nahimutang sa ikaduhang puwesto bitbit ang 7-3 nga baraha, alkansi lamang og usa ka duwa sa 7-2 nga Southwestern University (SWU)-Phinma Cobras.

Kini nagpasabot nga kon ugaling modaog ang Webmasters batok sa Warriors, hayan nga mapahayagan niini ang ilang misyon nga makasud sa top 2 nga makahatag kanila og twice-to-beat advantage sa semis.

Susama sab ang gilaraw sa Lancers sa ilang pakig-engkuwentro batok sa Wildcats nga dunay duha ka daog sud sa walo ka duwa.