Cokaliong Run gitakda sa December 1

CEBU, Philippines — Agi'g pagsaulog sa ika-30 niining anibersaryo, ang Cokaliong Shipping Lines, Inc. (CLSI) mopahigayon sa labing una niining running event nga pagaulohan og "Cokaliong Run: Full Speed at 30" karong Disyembre 1 sa SM City-Cebu Northwing parking area.

"This is the first ever run in the history of our company," matud pa ni Atty. Chesna Y. Cokaliong, ang Chief of Staff sa CLSI founder, CEO ug COO atol sa pormal nga paglusad sa ilang kalihukan kagahapon didto sa Bayfront Hotel. "We organized this to commemorate the 30th anniversary of Cokaliong Shipping."

"We want to do an event that is new for us. We want to involve the community and this is something that anyone can join," dugang pa ni Cokaliong nga usa sab ka disipulo sa dagan nga nakapakita'g aksiyon sa Standard Chartered Hong Kong Marathon, Maybank Bali Marathon, Singapore Marathon ug Singapore Airlines Charity Run. Apil sab siya sa relay event sa Ironman 70.3 Philippines dinhi sa Sugbo sud sa duha na ka sunod-sunod nga tuig.

Labaw sa pagpasiugda og dagan, si Cokaliong nagkanayon nga ila sab kini pamaagi nga makabawos sila sa katilingban. Iyang gipahibawo nga ang tanang makita sa ilang karera adto mapunta sa Edgar Cokaliong Foundation Inc. nga naghatag og pinansiyal, medikal ug scholararship assistance niadtong mga hinikawan sa maayong palad ug mga biktima sa kalamidad.

Sa laing bahin, dul-an sa P70,000 nga ganting salapi ang apud-apud ngadto sa mga mananaog ning makutas nga lumba nga naglangkob sa 5K, 12K ug 21k categories. Kapin sab sa P100,000 nga kantidad sa mga items ang i-raffle sa tanang mga partisipante.

Ang registration nagkantidad og P550 sa 5K, P750 sa 10K, ug P1,200 sa 21K apil na niini ang race shirt, race bib, loot bag, finisher's medal, raffle entry ug libreng pamahaw kortesiya sa Orange Brutus.

Mahimong magparehistro sa Cokaliong Run booth sa SM City-Cebu duol sa Zark's Burger.