CYBL nakig-alyansa sa MVP sports foundation

CEBU, Philippines – Ang Cebu Youth Basketball League nakig-alyansa sa MVP Sports Foundation ug una nilang misyon mao ang pagpahigayon sa MYBL Cebu, ang sentrong torneyo sa CYBL sa ikaduhang semester ning school-year 2019-2020.

Mosikad kini karong Oktubre 27 diha sa Magis Eagles Arena sa Sacred Heart School-Ateneo de Cebu sa Canduman, Dakbayan sa Mandaue.

"We are excited to partner with CYBL as it is aligned with MVPSF's thrust to strengthen grassroots development and have a program that provides an avenue for young talents to further hone their skills," matud pa ni MVPSF Marketing Head Maita David.

Ang torneyo naglangkob og upat ka age groups: Under 10, 12, 15, ug 18. Ang mga duwa ipahigayon matag weekend sugod karon Oktubre hangtod sa Marso 2020.

Sa inisyal nga lista, miabot ngadto sa 89 ka teams ang mopakita'g aksiyon sa duha ka division.

Ang mga duwa ipahigayon sa Sacred Heart School Mango Avenue Campus gym, Talisay Sports Complex, SMS-Boystown, Aznar Coliseum, USPF ug USC South.

"Cebu has proven that it can produce top-caliber athletes and we at Gilas are very proud of June Mar Fajardo, Roger Pogoy and Councilor Dondon Hontiveros," matud pa ni Gilas Pilipinas Assistant Manager Yvette Ruiz nga nahimamat og balik ang kanhi team captain sa Gilas nga si Hontiveros atol sa ilang pag-courtesy call ni Cebu City Mayor Edgar Labella.

Ang MVPSF naglaraw nga suportahan ang grassroots sports program sa Sugbo.

Gawas sa basketball,  paluyohan sab sa MVPSF ang weightlifting, boxing, taekwondo, football, futsal, rugby, badminton  ug golf.