Portmen, alin team-a mikulata sa ilang mga kontra
CEBU, Philippines – Mitala og makabungog nga kadaogan ang Portmen ug Alin Team-A (Alin Customs Brokerage) aron magpabiling wa'y pilde sa tagsa-tagsa nila ka dibisyon sa Aduana Basketball Club Cebu (ABCC) Season 2 Inter-Brokerage Cup 2019 niadtong Martes diha sa CPA gym sa north reclamation area.
Ang Portmen mikulata sa Avenido Customs Brokerage, 103-77 ubos sa bracket A, samtang ang Alin Team A miamong-among sab sa Alas Logistics Corp., 88-68 sa bracket B.
Sa kasamtangan, ang Portmen ug Alin Team-A parehong nagbitbit og 3-0 nga baraha uban sa HOV/Martinez Customs Brokerage.
Si Jaypee Maunes mipabuhagay og 26 puntos, milangkat og pito ka rebounds ug mipasa og tulo ka assists. Gawas sa iyang pagpangu sa Portmen, si Maunes mao sab ang best player of the game.
Human magtabla sa halftime, 43-all, ang Portmen milusad dayon og makalilisang nga ataki aron ilubong ang Avenido og 16 puntos human sa third period, 76-60.
Sila si Victor Taborada, Perry Niones ug Mark Rodriguez pareho sab nga miiskor og double figures alang sa Portmen.
Si Kevin Juntilla nga miiskor og 10 puntos maoy nangu sa 1-1 nga Avenido pinaagi sa iyang 10 puntos.
Sa laing bahin, si Ryan Villomo, RB3 Barral ug Jerry Singson nagkumbinar og 36 puntos aron pangulohan ang Alin Team-A nga wala na kulbai pa human miposte og 64-46 nga bentaha sa third period.
Tulo sab ka players sa Alas ang mihimo'g double digits pinangulohan ni Ryan Saavedra nga mibagdok og 18 puntos, gisundan ni Marvin Sillar nga midiga og 17 puntos ug Noel Medalle nga mihirit og 14 puntos.
PUNTOS MATAG USA
Unang duwa:
ALIN Team-A (88) – Villomo 14, Barral 12, Singson 10, Filoteo 9, Calo 9, Vasquez 8, Abinales 8, Alin 6, Torado 6, Estorgio 4, Palero 4, Into 2.
ALAS (68) – Saavedra 18, Sillar 17, N. Medalle 14, Lapinid 8, Alejano 4, Marata 2, Jimera 2, Entrampas 2, Laguna 1.
Ikaduhang duwa:
PORTMEN (103) – Maunes 26, Taborada 17, P. Niones 16, Rodriguez 14, C. Niones 8, Regidor 7, Oyao 6, Monteño 4, Rabago 3, Gabica 2.
AVENIDO (77) – Juntilla 10, E. Avenido 9, Lucernas 9, Oporto 8, Oswa 7, Tampus 6, Mondin 6, J. Avenido 6, Dungog 5, Tomado 4, I. Avenido 3, Apa 2, Torreon 2.
- Latest
