Baby Jaguars daog na gyud!

CEBU, Philippines — Sila si Kendrick Abarquez ug Kevin Guibao mikuha og atensiyon sa dihang gilampurnas sa University of San Jose-Recoletos (USJ-R) Baby Jaguars ang University of Cebu Lapu-Lapu and Mandaue (UCLM) Campus, 79-53 alang sa labing una nilang daog sa 19th Cebu Schools Athletic Foundation, Inc. (CESAFI) men's basketball tournament kagahapon sa Cebu Coliseum.

Si Abarquez mikolekta og 21 puntos uban ang pito ka rebounds, duha ka steals ug duha sab ka blocks, samtang si Guibao mitali og 18 puntos, lima ka rebounds, unom ka steals ug duha ka assists alang sa Baby Jaguars nga miputol sa upat ka sagunson nilang pilde.

Mipakitang gilas sab si Selwyn Pepito nga miposa og 16 puntos alang sa Baby Jaguars nga abante lamang og tres puntos sa sayong bahin, 15-12, apan milusad og nagkayong 39-22 rally sa tunga-tungang mga kuwarter aron pagpaburot sa ilang labaw ngadto na 54-34.

Wala na makabawi pa sukad niadto ang UCLM hinungdan nga naparot sa ikaupat ka sagunson nga higayon.

Si Joseph Nalos maoy nangu sa UCLM uban ang 15 puntos, lima ka rebounds ug upat ka steals, samtang si Daryl Guerrero milansang og 13 puntos sa pilderong kawsa.

Sa sayo pa, ang University of Southern Philippines Foundation (USPF) Baby Panthers nagsandig sa maanindot niining teamwork aron kastiguhon ang Cebu Institute of Technology-University (CIT-U) Baby Wildcats, 88-70.

Sila si Ramon Singson ug Christopher Isabelo nagkumbinar og 27 puntos, samtang sila si Kyle Ochavo, Byron Lawton ug Jansen Yap nagkumboya'g 33 puntos alang sa Baby Panthers  nga wala na molingi pa sukad miposte og 36-20 nga bentaha sa halftime dayon na sa pagrehistro sa ikalima nilang daog sud sa pito ka duwa.

Si Darryl Versales mihipos og 18 puntos, samtang sila si Sol Tirol ug Christian Sullano nakatigum og 21 puntos, apan wa'y nahimo kay ang Baby Wildcats nadakin-as sa ikaupat nga higayon uban   ang  usa  pa lamang ka daog.