Cariaso positibo Aces maka- hirit sa Governors' Cup.playoffs

CEBU, Philippines — Iglas gihapon ang unang daog alang sa bag-ong coach sa Alaska Aces nga si Jeff Cariaso, apan ang PBA legend masaligon nga makabawi ra sila ug makasulod sa playoffs sa PBA Governors' Cup.

Ang Alaska nangiwit karon sa standing sa ilang 0-4 win-loss record ug kinahanglan sila modaog karon batok sa Magnolia Hotshots aron mahayagan ang ilang tsansa sa playoffs.

Ang Alaska  ug  Magnolia mag-abot sa main game sa alas-6:45 sa gabii human sa duwa tali sa Meralco Bolts ug Phoenix Fuel Masters nga sugdan sa  alas-4:30 didto sa Smart Araneta Coliseum.

Ang Alaska   nakatilaw sa ikaupat nilang kapildihan  human gilubong sa Meralco  sa  iskor  nga 75-101  niadtong Biyernes.

Gihagit ni Cariaso ang bag-o nilang import nga si Franko House nga mamawi human. Si House igo lang miiskor og otso puntos batok sa Meralco.

Mag-atubang hinuon og lisud nga match-up si House kay ang iyang banggaon mao mao ang best import sa Magnolia nga si Romeo Travis.