Cansojong kampiyon sa seniors division
CEBU, Philippines — Ang Cansojong milusad og eksplosibong opensiba sa first half dayon na ngadto sa pagpukan sa Poblacion, 97-81 sa tagakay nilang duwa aron sakmiton ang kampiyonato sa seniors division sa 2019 Talisay City Mayor's Cup Inter-Barangay Basketball Tournament niadtong Martes didto sa Talisay City Sports Complex.
Sila si Kim Trigue ug Philip Geraldez parehong mibomba og 24 puntos alang sa Cansojong nga mipakurat sa Poblacion human ablihi ang duwa pinaagi sa masipang 24-14 nga buto.
Nagpadayon ang kabangis sa Cansojong sa ikaduhang kuwarter aron pag-inat sa ilang labaw ngadto na sa 18 puntos, 57-39 sa halftime.
Sila si Christian Sayson ug Jade Restauro dako sab og naambag sa Cansojong human mikadlit og 15 puntos matag usa.
Si Jess Cabisas miposte og 22 puntos, si Allan del Rosario miiskor og 20, samtang si Rovan Kadenas mipupo og 18 puntos, apan nakawang ang ilang paningkamot sa habig sa Poblacion.
Sa gubat alang sa ikatulong dapit, sila si Lourben Manayon, Raffy Racaza ug Paul Torrecampo nagkumbinar og 40 puntos sa dihang gibuntog sa Tangke ang Lawaan 3 sa iskor nga 96-91.
Ang Tangke alkansi og singko puntos human sa unang tunga, 46-51, apan nanginit sa nahibiling duha ka kuwarter aron pagpatiurok sa Lawaan 3.
Si Jomari Mellabangco mibahog og 25 puntos ug si Joshua Mellabangco mitali og 17 puntos, apan parehong nangahuyhoy ang abaga gumikan sa pagka-sukarap sa Lawaan 3.
- Latest
