Portmen, HOV/Martinez nagsawo sa liderato sa abcc Inter-Brokerage Cup 2019

CEBU, Philippines – Temporaryo karong gisaw-an sa Portmen ug HOV/Martinez Customs Brokerage ang liderato sa bracket A sa Aduana Basketball Club Cebu (ABCC) Season 2 Inter-Brokerage Cup 2019.

Kini human nila gilubong ang ilang mga kaatbang niadtong Martes sa gabii diha sa Cebu Port Authority (CPA) gym sa north reclamation area.

Ang Portmen milubong og taga-liog sa Alin Team B (I & R Alin Logistics Int'l. Corp.) sa iskor nga 91-59, samtang gilat-an sab sa HOV/Martinez ang Grancho Customs Brokerage, 90-68.

Ang Portmen ug HOV/Martinez kasamtangang nagbitbit og 2-0 nga baraha.

Si Perry Niones nga maoy best player of the game, maoy nangu sa upat ka Portmen players nga miiskor og double figures pinaagi sa iyang 20 puntos.

Laing upat nga nakatampo og dako sa Portmen mao silang Chelsea Niones ug Boodee Monteño nga parehong miantog og 12 puntos. Si Victor Taborada mihirit og 10 puntos sa Portmen, kansang solidong depensa sa third period maoy gihimo nilang hinagiban diin ila lang gipaiskor ang Alin Team B  og dos puntos batok sa 25 puntos nga ilang nahimo sa maong kuwarter alang sa ilang komportabling labaw, 63-35.

Nagkumbinar og 30 puntos silang Justine Toring ug Noel Castillo aron pangulohan ang Alin Team B nga nagbitay gihapon sa bracket A standing sa ilang 0-3 nga baraha.

Sa laing bahin, ang giilang best player of the game nga si Glen Pendang mibagnos og 18 puntos aron mangulo sa scoring sa HOV/Martinez.

Tres puntos ra ang labaw sa HOV/Martinez sa first quarter, 19-16, apan mas nangigo sila sa second period nga nakapaburot sa ilang labaw ngadto sa 48-29 sa halftime ug sukad niadto wala na sila motugot nga makasikit pa ang Grancho.

Sila si Jim Villa ug Shaun Cal mitampo'g 10 puntos matag usa sa HOV/Martinez.

Ang Grancho nga wala pa'y daog sa duha ka duwa, gipangulohan nilang Chamvers Remonde ug Yvien Trangia nga parehong mikabya'g 17 puntos, samtang si Luther Dinela miambit og 10 puntos sa pilderong koponan.

PUNTOS MATAG USA

Unang duwa:

HOV/Martinez (90) – Pendang 18, Villa 10, Cal 10, Rollon 9, Enriquez 8, Jadraque 7, Elloren 6, Gambe 6, Villacastin 4, Del Rosario 2, Dungog 2.

GRANCHO (68) – Remonde 17, Trangia 17, Dinela 10, Lope 6, Garde 6, Matibag 4, Rabago 3, Gornez 2, Cabanada 2, Aragon 1.

Ikaduhang duwa:

PORTMEN (91) – P. Niones 20, C. Niones 12, Monteño 12, Taborada 10, Maunes 9, Rabago 8, Regidor 7, Rodriguez 4, Oyao 2, Gabica 2.

ALIN Team B (59) – Toring 16, Castillo 14, Baltonado 6, Egpit 6, Gamao 6, Manolong 3, Nudalo 2, Laurel 2.