Lisud, apan tam-is nga kalampusan
CEBU, Philippines — Taas na sila og kasinatian ug dili na maihap ilang mga kalampusan isip runners, apan wa damha nga sila si Ruffa Sorongon ug Prince Joey Lee pulos nakasugat og pagsuway sa wala pa nila dominari ang tagsa-tagsa nila ka dibisyon sa Cebu elimination sa 43rd National Milo Marathon kagahapon didto sa Cebu City Sports Center.
Si Sorongon pabiling reyna sa 21K women's human siya gauna bisan pa og nag-antos siya sa sakit sa iyang paa dihang anaa pa siya sa tunga-tungang bahin sa rota. Gisakmit niya ang ikaupat niyang sunod-sunod nga kampiyonato sa oras nga 1:31:31. Gisundan siya ni Evamie Villarin sa oras nga 1:32:02, samtang si Engie Estillor maoy third placer sa oras nga 1:41:16.
"Wala nako ga-expect ato nga mudaog ko. Sakit kaayo ang tiil, naapektohan gyud ako dagan," matud pa sa 28-anyos nga si Sorongon, kinsa mangandam og sakto alang sa National Finals nga ipahigayun sa Enero sunod tuig didto sa Manila.
Sa iyang bahin, si Lee mitapos sa labing paspas nga oras nga 1:11:59 aron maghari sa 21K men's open. Nabuhat niya kini taliwala sa hugot nga kompetisyon. Napuhalan niya ang veteran nga si Ariel Saballa kinsa adunay oras nga 1:14:29, samtang si Florendo Lapiz mitugpa sa ikatulo sa oras nga 1:14:40."Dili gyud basta-basta ang Cebu leg. Lisud ang rota unya daghan kaayo mga kusug nga competitors. Wa ko ga-expect gyud nga ako moy mo-champion," matud pa niya.
Sa 10K division, midaog sila si Kenyan Eric Chepsiror ug Milessa Dinneen sa oras nga 33:38 ug 41:45, matag usa. Misidlak usab sila si John Marie Dizon (18:02) ug Asia Abucay Paraase (21:13) sa 5K category, samtang sila si Louis Gabriel Ariola (10:16) ug Laurence Yvony Garcia (11:30) maoy mananaog sa 3K.
Sa iyang bahin, si Milo Marathon Cebu leg organizer Ricky Ballesteros mideklarar nga malampuson ang lumba nga gisalmutan sa kapin 24,000 ka mga runners, bisan pa sa gamayng mga kaso sa mga nakuyapan atol sa dinaganay.
- Latest
