Kapin 24k modagan sa Milo Marathon

CEBU, Philippines – Mabulit og color green ang mga dagkong kadalanan sa Sugbo gumikan kay 24,000 ka   runners ang managan sa 43rd National Milo Marathon Cebu elimination race ugma sa buntag nga manukad sa  Cebu Normal University ug matapos sa Cebu City Sports Center.

Kini ang labing daghang entrante nga mosalmot sukad niadtong tuig 2003 diin mitala ang prestihiyosong lumba og 25,000 ka mga runners. 

Napalig-on sa Cebu leg ang pangangkon nga kini ang usa sa mga premyadong running binyu sa nasud.

Si Milo Marathon Visayas organizer Ricky Ballesteros miingon nga miabot na sa 24,000 ka mga runners ang nagpalista ug gipaabot nga motubo pa kini tungod kay modawat pa sila og mga entrante karong adlawa. Ang lumba gilangkuban sa 3K, 5K, 10K ug 21K categories. 

"This is the biggest number of participants we gathered since 2003 where we reached 25,000 runners," matud pa ni Ballesteros atol sa press conference kagahapon didto sa Cebu Grand Hotel. "Honestly, we expected around 15,000 but we were overwhelmed when it surpassed our expectation."

Sa iyang bahin, si Milo Sports Executive Lester Castillo mibutyag nga kanunay nila nga giisip ang Cebu leg nga usa sa   labing malampusong legs ug makakaplag og mga masaarong runners nga posibleng malakip sa national team sa umaabot.

Malipayon si Castillo tungod kay ang duha ka pambato sa nasud sa marathon event sa Southeast Asian Games nga sila si Mary Joy Tabal sa Cebu ug Jeson Agravante sa Silay City pulos produkto sa Milo Marathon.

"The theme is 'One Team. One Nation. Go Philippines!' because we are showing our full support to the Philippine team," matud pa ni Castillo. "We are also committed in helping Philippine Athletics Track And Field Association (PATAFA) on its talent identification program." 

Gumikan niini, ang  mga opisyal sa Milo misibog sa naandan nilang National Finals sa Disyembre ngadto sa Enero sunod tuig aron mopukos sila sa SEAG. Games.

Sa iyang bahin, si Willy De Ocampo, Nestle Philippines Vice President,    gusto  nga ang Milo Marathon magpadayon sa ilang misyon nga mapalig-on ang pamilya ug komunidad pinaagi sa sport.

"We want to build not only a nation of champions but also a healthy nation," matud pa niya.

Ang top 10 finishers sa matag kategoriya makadawat og ganting salapi, tropeyo ug medalya.

Gawas sa lumba may premyo nga madawat sa biggest club o company delegation, inter-club/company running competition, biggest school delegation, inter-school running competition ug sa cheerleading contest.