GUV Cup mosikad karon
CEBU, Philippines – Human sa unom ka tuig nga pagkawala, ang Governor Gwen Garcia Unity Volleyball Cup kon GUV Cup mobalik sa eksena sa Cebu sports pinaagi sa usa ka bonggang seremonyas sa pagbukas sugod karong alas-9 sa buntag diha sa Mandaue City Cultural and Sports Complex.
Ang usa ka oras nga programa nga mosikad pinaagi sa parada sa mga atleta pagatabungan mismo ni Cebu Govenor Gwen Garcia, ang inahan ning malampuson nga developmental sports program alang sa mga batan-on nga spikers sa tibuok Probinsiya sa Sugbo.
Sa giatngan niining pagkabanhaw, ang GUV Cup nakaagni og mga partisipante gikan sa 35 ka lungsod nga gibahin sa pito ka clusters.
Ang Talisay City, Minglanilla, Naga City, San Fernando, Carcar, Sibonga ug Argao anaa sa Cluster 1; ang Dalaguete, Alcoy, Boljoon, Oslob, Santander, Samboan ug Ginatilan sa Cluster 2; ang Malabuyoc, Alegria, Badian, Moalboal, Alcantara, Ronda, Dumanjug ug Barili sa Cluster 3; ug ang Aloguinsan, Pinamungajan, Toledo City, Balamban, Asturias, Tuburan ug Tabuelan sa Cluster 4.
Anaa ang San Remigio, Bogo City, Medellin, Daanbantayan, Tabogon ug ang Sta. Fe, Bantayan, ug Madridejos sa isla sa Bantayan sa Cluster 5; ang Borbon, Sogod, Catmon, Carmen, Danao City ug ang San Francisco, Poro, Tudela ug Pilar sa isla sa Camotes sa Cluster 6; ug ang Compostela, Liloan, Consolacion, Mandaue City ug Cordova sa Cluster 7.
- Latest
