Sharks lupig sa Supremos
CEBU, Philippines – Human gipakgang ang Zamboanga Family's Brand Sardines sa miagi nilang duwa, ang Casino Ethyl Alcohol-Cebu Sharks wala makasustinir sa ilang kainit hinungdan nga miyukbo ngadto sa Caloocan Supremos, 54-70 sa 2019 Maharlika Pilipinas Basketball League (MPBL) Lakan Cup niadtong Miyerkules sa gabii didto sa Caloocan Sports Complex sa kaulohan.
Nindot unta ang sinugdanan sa Sharks ug gani nakalabaw pa sila sa iskor nga 13-10, apan wala na sila makaugpo pa human gipabuthan og nagkayong rally sa Supremos sa tunga-tungang mga kuwarter.
Ang Supremos milusad og 20-10 run sa ikaduhang kuwarter aron pagposte og 30-23 nga labaw sa halftime. Ila na sab giwani ang Sharks sa ikatulong hunat sa aksiyon aron pagpaburot sa ilang labaw ngadto na sa 13 puntos, 50-37 padung sa final quarter.
Igo lamang nakasikit ang Sharks ngadto sa 49-58 sa lay-up ni Fletcher Galvez sa nahibiling 4:12 sa duwa gumikan kay ang Supremos misira sa duwa pinaagi sa 12-5 rally.
Si Paul Joseph Sanga mitapos uban ang 17 puntos ug tulo ka rebounds alang sa Supremos nga miinat sa ilang record ngadto sa 9-7.
Si William Bill McAloney mitali og 14 puntos ug siyam ka rebounds, samtang si Patrick Jan Cabahug mikamada og 12 puntos ug upat ka rebounds, apan wala sila'y nahimo aron paglikay sa Sharks nga makatilaw sa ikasiyam nilang pilde sa 14 ka duwa.
- Latest
