Kalig-on sa Cobras sukdon sa lancers

CEBU, Philippines – Ang Southwestern University (SWU)-Phinma Cobras temporaryo karong naghari sa liderato kay wala pa'y pilde sa tulo ka duwa.

Apan ang kalig-on sa Cobras hingpit nga masukod sa dihang ilang sangkaon ang three-time defending champion University of the Visayas (UV) Green Lancers sa 19th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.

Ang premyo sa alas- 6:45 sa gabii nilang engkuwentro mao ang solong liderato sa seniors division.

Makigharong ang Cobras batok sa nagmangtas nga Lancers nga lab-as pang mihaw-as gikan sa duha ka sagunson nga daog.

Human gipakuratan sa University of Cebu (UC) Webmasters duha ka semana ang milabay, ang Lancers ni coach Gary Cortes miihaw sa Cebu Institute of Technology-University (CIT-U) Wildcats, 105-65, ug dayon gilat-an ang University of San Jose-Recoletos (USJ-R) Jaguars, 76-56 duha ka gabii pa ang milabay.

Gumikan niini, ang Cobras angayan nga mangandam sa mas agresibong ataki gikan sa Lancers.

Andam hinuon ang Cobras nga moatubang kon unsa man gani ang ipakita kanila sa Lancers gumikan kay duna man sila'y kasaligang import nga si Lamine Thiam gikan sa Senegal nga makahatag og liderato sa uban pa nilang mga pambato nga naglangkob nilang Shaq Imperial, Dyll Roncal, William Polican, Gerald Fernandez, Red Cachuela, Harvey Sanchez ug Louie Nazareno.

Hinuon, lisud gyud nga tahas ang sagubangon sa Cobras batok sa Lancers nga namungingi sab og talento ubos sa pagpangu sa langyaw nilang student-athlete nga si Lassina Coulibally.

Makadugang sab sa kabagsik sa opensiba sa Lancers ang kalibre nilang si Ted Saga, Michael Maestre, Gabriel Cometa, Jancork Cabahug,  Gileant Delator, Sheldon Gahi, Monic Soliva, Froiland Maglasang ug Jossier Hassan.

Sa juniors division, ang Don Bosco Greywolves ug University of San Carlos (USC) Baby Warriors mosuway og putol sa duha ka sagunson nilang pilde, apan usa kanila ang mahagba gihapon kay sila man maoy mag-abot sa pasiunang duwa sa alas- 5:15 sa hapon.