Mikey o Danny pilian ni Pacquiao

CEBU, Philippines – Anaa na lang nila ni Mikey Garcia ug Danny Garcia ang pilian nga alang sa sunod nga away ni Manny Pacquiao  unya  sa Marso ug Abril sunod tuig.

Mao kini ang gipadayag ni Sean Gibbons, ang boxing affairs manager ni Pacquiao. Si Yahoo! Sports boxing columnist Kevin Iole miingon usab nga nakakuha siya og impormasyon gikan sa kampo ni Pacquiao ug mipasumbingay siya nga segurado na nga usa ka Garcia ang sangkaon sa WBA welterweight champion. 

"Pacquiao will be fighting someone named Garcia next," matud pa niya.

Ang duha ka Garcia pulos kanhi world champions. Si Danny usa ka two-division world champion sa junior welterweight ug welterweight divisions, samtang si Mikey kanhi four-division world champion.

Ang pamahayag sa kampo ni Pacquiao mipahanap sa posibilidad nga adunay mahitabong unification fight tali ni Pacquiao ug sa modaog sa away tali nila ni Shawn Porter ug Errol Spence Jr. nga mag-ilog sa IBF ug WBC welterweight belts karong Domingo didto sa California. 

Hinuon, miingon si Gibbons nga ang makapausab sa hukom sa Team Pacquiao sa sangka  ni Garcia mao ang pagdawat ni Floyd Mayweather Jr.  sa usa ka 'rematch'.