Durant No. 7 na; Irving nag-workout sa Nets

CEBU, Philippines — Ang injured superstar nga si Kevin Durant mipakita sa bag-o niyang jersey, samtang si Kyrie Irving nakuhaan og hulagway nga nag-workout uban sa Brooklyn Nets sa NBA.

Tipik lamang kini sa pagpublikar sa Nets sa ilang preparasyon sa umaabot nga 2019-2020 season sa NBA.

Si Durant nakahiagum og gisi sa tuo niyang Achilles tendon sa miaging NBA Finals ug lagmit dili siya makaduwa tibuok season alang sa Nets human mibiya sa Golden State Warriors ug mipirma og kontrata sa Brooklyn.

Mapasigarbuhon si Durant nga mibandera sa iyang No. 7 jersey uban sa Nets nga usa ka kausaban sa No. 35 nga iyang gisul-ot sa pagkadaog niya og duha ka kampiyonato uban sa Warriors.

Ubos sa poder sa Brooklyn, makauban ni Durant sa umaabot ang laing superstar nga si Kyrie Irving.

Ang 27-anyos nga si Irving nga nakasakmit og NBA title kauban si LeBron James sa Cleveland Cavaliers niadtong 2016, mitapon sa Celtics niadtong 2017. Miduwa siya og duha ka seasons sa Boston sa wala pa misibat aron adto na sab mangindahay sa Nets.

Si Irving ug ang Nets gikatakda nga makigsangka ni James ug Los Angeles Lakers sa duha ka NBA pre-season games didto sa China karong Oktubre 10 didto sa Shanghai ug Oktubre 12 didto sa Shenzhen.