Nahanaw na gyud!

CEBU, Philippines — Napapas ang paglaum sa Gilas Pilipinas nga makabaton og luna sa 2020 Olympics human makatilaw sa ikaupat nilang pilde batok sa Tunisia, 86-67 niadtong Biyernes sa gabii didto sa Beijing, China.

Sa maong kapildihan, ang Gilas 0-4 na sa FIBA World Cup.

Ang Gilas aduna pa'y nahibiling usa ka duwa   batok sa Iran karong alas-8 sa gabii. 

Laraw sa Gilas nga makakawat og daog sa dili pa sila mouli dinhi sa Pilipinas aron dili maisip nga usa ka dakong trahedya ilang kampanya sa World Cup.

Batok sa Tunisia, hinay kaayo ang sugod sa Gilas  nga maoy hinungdan nga gilubong dayon sila og 17 puntos sa iskor nga 10-27.

Ang Tunisia nakita nga mas hapnig sa ilang opensa ug yano silang mipuntos duol sa ring.

Timaan sa balanseng opensa sa Tunisia mao ang lima nila ka players nga nakahimo og double-figures sa pagpangulo sa NBA center nga si Salah Mejri nga adunay 12 puntos.

Si Blatche mipuntos og 24, apan siya lang ang nakahimo og double-digits. Si Troy Rosario adunay otso, samtang si Mark Barroca mitampo og siyete puntos.

Karong adlawa, ang Gilas makigbangga sa pamilyar nga kaatbang nga Iran nga gibidahan ni Hammed Haddadi. Ganado ang Iran batok sa Gilas tungod kay nakahimo sila pagpilde sa Angola sa classification stage.

Dili sama sa Gilas, maninguha ang Iran nga modaog aron sila ang mogawas nga adunay labing nindot nga rekord gikan sa Asian zone nga mohatag kanila sa luna sa Olympics.