Sugboanong car racer maoy best Asian Driver
CEBU, Philippines — Ang Sugboanong car racer nga si Daniel Miranda nagkasugakod sa labing ngil-ad nga crash sa iyang karera aron paglugwa nga Best Asian Driver sa 2019 TCR Asia International Series niadtong Domingo didto sa Bangsaen Street Circuit sa Thailand.
Nindot ang gipakitang salida ni Miranda sa Eurasia Motorsport didto sa Bangsaen Grand Prix 2019, ang katapusang kumbati sa TCR Series, gikan sa praktis hangtod sa qualifying round.
Apan si Miranda nga gipaluyohan sa Cebuana Lhullier nakabagat og kakulian sa dihang ang usa ka awto nga iyang gigukod nabag-id sa blind curve sa ikaunom nga lap sa maong napaulo ka lap nga aksiyon nga naglangkob og 3.749 ka kilometro matag lap.
Samtang ang duha ka awto natanggong sa track, lain sab nga nagpasutoy nga driver ang mibangga kanila hinungdan sa nakadakop og kayo ang iyang awto.
Dali ug paspas hinuon nga nakagawas si Miranda sa iyang Hyundai i30N TCR, apan puwerteng gusbata sa atubangan nga bahin sa iyang awto. Maayo na lang kay ang ilang mga mekaniko daw sa nakahimo og madyik sa pag-ayo sa iyang awto alang sa final nga lumba niadtong Domingo.
Matud pa sa amahan ni Daniel nga si Martin Miranda nga nabungkag ang clutch sa iyang anak sa final race, apan nakahuman kini og 12 ka laps hinungdan nga gikonsidera si Daniel nga usa ka finisher sunod ni race 2 winner Diego Moran.
Sa kinatibuk-an, si Miranda mitali og 84 puntos aron paglandig sa ikaunom nga puwesto sa final race ug 4th overall sa series sunod ni Luca Engstler sa Germany.
Gumikan niini, si Miranda maoy gideklara nga kampiyon sa Asian division sa TCR series. Iyang gilupig sila si Gao Hua Yang nga dunay 71 puntos ug ang Koreanong si Kim Jin Soo nga mihipos og 58 puntos. "He is the best amongst all Asians after 10 rounds. We had problems on the formation lap as the car was limping around the track but he needed to finish 12 laps out of 15 to be classified as finisher which he got! Thank you to all the hard working Pinoy mechanics who had no sleep at all to fix the car after a huge shunt," matud pa sa coach ni Miranda nga si Roland Hermoso.
- Latest
