Mayor's Cup sa Talisay ug Consolacion mosikad na

CEBU, Philippines — Duha ka mga inter-barangay nga liga sa managlahing dapit sa probinsiya ang pagasugdan karong adlawa.

Sa Talisay City Sports Complex, ang 2019 Talisay City Mayor’s Cup Inter-Barangay Basketball Tournament mosikad na sa alas-3 sa hapon.

Usa ka simpleng seremonyas sa pagbukas ang ipahigayon nga pagasugdan sa parada sa mga atleta gikan sa 21 ka teams.

Ang mga entranteng koponan gikatag sa upat ka bracket nga moduwa ubos sa single round robin format sa eliminasyon sa juniors (20 Under) ug seniors (30 Under) division.

Ang top 2 teams matag bracket moabante sa quarterfinals.

Ang makalahutay motikang sa crossover semis diin ang mga mananaog maoy magbugno a kampiyonato.

Didto sa Consolacion Sports Complex, ang 10th Mayor Alegado Fiesta Basketball League subhan na sab sa ala-1 sa hapon. Miabot ngadto sa 21 teams ang mopakitag aksiyon sa torneyo nga dunay tulo ka mga kategoriya, ang midget (17 Under), SK Juniors (21 Under) ug seniors.

Ang mga partisipante gibahin sa upper barangays o category B nga walay mga kanhi o sa kasammtangang varsity players, ug ang mountain barangays o category A nga abli sa mga aktibo ug kanhi varsity ug kanhi commercial players.

Ang open division diin makaapil ang kanhi ug kasamtang varsity ug commercial players modugang og lamas sa 10th Alegado Cup.