Upat sikop sa buy-bust sa Dakbayan Sugbo
CEBU, Philippines — Nikabat ngadto sa P300 mil ang balor sa ilegal nga drugas nga nasakmit atol sa tulo ka buy-bust operation sa kapolisan kagahapon sa kadlawon diha sa Sitio Ponse Dos, Barangay Carreta, Dakbayan sa Sugbo.
Unang nadakpan sa nahisgutang operasyon si Rogelio Ciano alyas “Roger”, 40-anyos, residente sa maong dapit.
Nasakmit gikan kang Ciano ang 12 ka gramos nga shabu nga nibalor ngadto sa P81,600.
Matud sa hepe sa Waterfront Police Station Police Major Joemar Pomarejos nga si Ciano ang gitumbok nga tigpalitan og drugas ang nadakpan una nilang nadakpan sa buy-bust operation.
Sunod nga operasyon nasikop si Angelito Alcachupas, 24-anyos, alyas “Sadam”.
Nasakmit gikan sa maong suspetsado ang 15 ka gramos nga shabu.
Matud ni Pomarejos nga human nasikop ni Alccachupas gitug-an niini ang iyang tinubdan sa ginadiling drugas.
Positibong napalitan ang gitumbok nga tinubdan ni Alccachupas nga si Ronnie Lape, 42-anyos, residente usab sa dapit. Si Lape nakuhaan kini og 15 ka gramong shabu nga nibalor ngadto sa P102 mil.
Lakip nga nadakpan ang giingong kakunsabo ni Lape nga si Editha Abellana, 55-anyos, residente usab sa nahisgutang dapit.
Si Abellana nakuhaan og duha ka medium nga paketeng shabu diin adunay gimarka nga 10 ka gramos ug nibalor kini ngadto sa P68 mil. (/BDB)(BANATNEWS)
- Latest
