AC Troopers kampiyon na sab sa CELBA Caging
CEBU, Philippines — Nakampiyon na sab ang AC Troopers human gibihag ang team Porma, 75-71 sa kulbahinam nga finals sa Cebu Legends Basketball Association (CELBA) Season 5 niadtong Sabado didto sa Canduman Housing gym, Dakbayan sa Mandaue.
Kini ang ikatulong titulo nga nasakmit sa AC Troopers ubos sa liderato sa ilang team owner nga si P/Capt. Dondon Coloscos.
Kuyaw kaayong nakaduwa si Rex Gonzaga atol sa fourth quarter diin mibagnos siya og 10 sa iyang 18 puntos aron pangulohan ang AC Troopers.
Nakatampo sab og dako sa kadaogan si Joel Cabahug, kansang 10 puntos sa first period maoy pabilo sa makalisang nilang ataki nga naghatag kanila og 27-19 nga bentaha human sa unang 10 minutos sa duwa.
Nahulga ang AC Troopers human ang team Porma milabaw sa labing unang higayon, 64-63 sa tunga-tungang bahin sa fourth quarter. Sukad niadto, nagpuli-puli og labaw ang duha ka karibal.
Misamot ka kulbahinam ang aksiyon dihang nakalabaw ang team Porma, 71-all sa nahibiling 40 segundos sa itsa ni Beinsen Herbieto. Apan gitubag kini ni Gonzaga pinaagi sa upat ka sunod-sunod nga free throws nga maoy nagsilyo sa daog sa AC Troopers.
Bugtong si Castillo lang ang miiskor og double figures sa team Porma ni Engr. Tony Alcover pinaagi sa iyang 10 puntos.
Sa duwa alang sa ikatulong dapit, ang Luke Genesis midaog batok sa team Buenavista ubos sa pagpangulo ni Dindo Aligway nga mipabuto og 22 puntos.
Laing tulo ka players ang miiskor og double figures sa Luke Genesis ni Nathaniel 'Telly' Herbieto.
Ang Buenavista ni Alan Buenavista gipangulohan sab ni Michael Tañan sa iyang 16 puntos.
Ang liga giorganisar ni ballclub president P/Capt. Dondon Coloscos.
Ang mga duwa ubos sa superbisyon ni league commissioner Engr. Roel Tayag inabagan nilang Richard Limosnero, Willy Medillo ug Lloyd Chavez.
PUNTOS MATAG USA
Unang duwa:
LUKE Genesis (86) – D. Aligway 22, Cavan 18, Estremos 14, Aligway 10, Borres 6, T. Herbieto 6, Alcibar 2, Lelis 2.
BUENAVISTA (78) – Tañan 16, Borga 9, Grafe 9, Amancio 7, Rayla 7, Mendoza 6, Buenavista 4, Medillo 3, Yares 2, Alfanta 2, Flores 2.
Ikaduhang duwa:
AC Troopers (75) – R. Gonzaga 18, J. Cabahug 10, Ouano 7, Englis 6, H. Magale 6, D. Suico 5, Chavez 4, Bernal 4, Velasco 3, Areja 3, Plecerda 2, Cañada 2, Budiongan 2.
PORMA (71) – Castillo 10, Alquezar 9, Cabunillas 8, Suson 8, Ouano 8, B. Herbieto 6, Mahusay 5, Herbieto 4, Fritz 2, Pelit 2, Tantuan 2, Bukiron 2.
- Latest
