USC-NABC Mayor's Cup mosikad na

CEBU, Philippines — Miabot ngadto sa katloan ka teams nga gikatag sa upat ka dibisyon ang mopakita'g aksiyon sa University of San Carlos-North Alumni Basketball Conference 2019 Cebu City Mayor's Cup nga mosikad na karong hapon diha sa USC North Campus gym.

Ang 2019 NABC core group gipangulohan ni USC-NABC President Ernest Evangelista. Si Ryan Villaflores maoy USC-North Alumni Association president, samtang si Jax Bautista maoy league organizer ug commissioner.

Mga koponan nga mokumbati mao ang Batches '82, '85, '86, '87, '88, '90 ug '91 sa seniors division, Batches '92, '93, '94, '95, '96, '97, '98 ug '99 sa Division 1, Batches 2000, 2001A, 2001, 2002A, 2002B, 2003, 2004 ug 2005 sa Division 2 ug Batches 2007, 2008, 2009, 2010, 2011, 2013 ug 2015 sa Division 3.

Moduwa sila ubos sa single round robin format. Ang top 2 qualifiers awtomatik nga moabante sa semifinals. Samtang ang No. 3 ug No. 4 dunay twice-to-beat advantage batok sa No. 6 ug No. 5 sa quarterfinal round.

Tinagakay nga duwa ang mahitabo sa semis, samtang ang division championship usa ka best-of-three series. 

Sa laing bahin, usa ka simpleng seremonyas sa pagbukas ang ipahigayon sa dili pa ang mga duwa sa alas-3 sa hapon.

Mga espesyal nga dinapit sa maong kalihukan mao sila si Cebu City Mayor Edgardo Labella, Philippine Sports Commissioner Ramon Fernandez  ug Councilor Dondon Hontiveros.