'Prince' Albert, Santisima mobida sa 'Pinoy Pride' 46
CEBU, Philippines — Si 'Prince' Albert Pagara ug ang stablemate niini sa ALA Gym nga si Jeo Santisima tataw nga maoy sentro sa atensiyon sa dihang makigsangka sila batok sa managlahing kontra sa co-main event sa Pinoy Pride 46 karong Sabado, Agosto 17 didto sa Ormoc City Superdome.
Makigkarong si Pagara batok ni knockout artist Ratchanon Sawangsoda sa Thailand, samtang si Santisima makigsangka ni Alvius Maufani sa Indonesia.
Sukad siya makatilaw sa labing una ug bugtong pa niyang pilde sa iyang karera sa mga kamot sa Mehikanong si Cesar Juarez niadtong Hulyo 2016, dalaygon ang gihimong pagbangon ni Pagara nga mao ang kasamtangang WBO Intercontinental super bantamweight champion.
Testamento niini ang lima ka sagunson niyang daog nga nakapainat sa iyang rekord ngadto sa 31-1 uban ang 22KOs.
Gumikan niini, ang 25-anyos nga si Pagara mikatkat ngadto sa ikatulong dapit sa WBO rankings sunod sa iyang mga kababayan nga sila si Marlon Tapales ug Juan Miguel Elorde. Si Emmanuel Navarrete sa Mexico maoy naghari karon sa ilang dibisyon.
Dili hinuon angayan nga mokompiyansa si Pagara batok sa 28-anyos nga si Sawangsoda bisan tuod og duna na kini tulo ka pilde sa 15 ka away gumikan kay ang tanan niining daog pinaagi man sa knockout. (BANAT NEWS)
- Latest
