TNT moposte'g , 3-1 sa series

CEBU, Philippines — Laraw sa TNT KaTropa nga moposte og komportabling labaw batok sa San Miguel Beermen sa Game-4 sa ilang 'best-of-seven' finals series karong gabii didto sa Smart Araneta  Coliseum.

Ang duwa sugdan sa alas-6:35 sa gabii.

Sa kasamtangan, ang  TNT nakabentaha sa series, 2-1  human sa laing dominanteng kadaogan sa Game-3 sa iskor nga 115-105  niadtong Biyernes.

Ang nag-unang kandidato pagka-best import nga si Terrence Jones Jr. nagkanayon nga paningkamuton nila nga mohimo og sunod-sunod nga daog aron dako ilang tsansa nga modaog sa PBA Commissioner's Cup title.

Ang kanhi Houston Rockets forward wala nagmangtas sa Game-3 diin mirehistro siya og 37 puntos aron pangulohan ang TNT.

Si Jones nakahatag og labad sa depensa sa  Beermen ug mismo si coach Leo Austria miangkon nga ang import maoy hinungdan sa dakong bentaha sa opensa sa KaTropa.

Hinuon, ang multi-titled coach sa San Miguel malaumon gihapon nga makabawos ug gisaligan niya ang reigning MVP nga si JuneMar Fajardo nga mobangil sa ilawom nga bahin sa ring aron depensahan ang mga ataki ni Jones.

Dili lang si Jones ang bantayanan sa San Miguel tungod kay padayong ang nindot nga performance  sa Sugboanong guwardiya nga  RR Pogoy nga mitira og 29 puntos atol sa Game-3.

Kon modaog karon, ang TNT adunay kahigayonan nga mosakmit sa labing una nilang PBA title sukad niadtong tuig 2014.