Gilas mitumba sa Ivory Coast
CEBU, Philippines – Taliwala sa kontrobersiya kabahin sa pamahayag nga gibuhian ni Presidente Rodrigo Duterte nga matud pa walay tsansa ang Gilas Pilipinas nga modaog sa FIBA World Cup, gipamatud-an sa nasudnong koponan nga seryoso sila nga mohatag og dungog sa Pilipinas sa maong prestihiyosong kompetisyon nga buksan karong Agosto 31 didto sa China.
Human sa ilang dominanteng kadaogan batok Congo, 102-80 niadtong Miyerkules didto sa Spain, ang Gilas milansang na sab og daog ug ning higayona batok sa Ivory Coast sa iskor nga 94-83 sa tune-up tournament kagahapon didto sa Guadalajar sa Spain.
Gipangulohan gihapon ni Andray Blatche ang kadaogan nga mipugnit og 18 puntos ug mipasa og 10 ka assists. Nakatabang sab og dako sa scoring si Paul Lee nga mitira og 16 puntos.
Ang Gilas agresibo sa pagsugod sa duwa ug miposte kini og 28-19 nga labaw sa first half. Misikit ang mas dagkong Ivory Coast sa final period sa iskor nga 75-79, apan ang Gilas daling nakahimo og adjustment sa depensa aron pugngan ang rally sa ilang mga kaatbang.
Laing miiskor og double digits sa Gilas mao si Japeth Aguilar nga adunay 12 puntos, ug rookie CJ Perez sa iyang 11 puntos.
Gumikan sa ilang sunod-sunod nga kadaogan, ang Gilas kompiyansa nga makasugakod sa mas bug-at nga duwa sa maong tune-up tournament.
Gikan sa Guadalajara, ang Gilas mobiyahi ngadto sa Malaga diin nagpaabot kanila ang rank No. 2 sa FIBA nga Spain.
Ang Spain bidahan sa mga NBA stars sama nila ni managsuong Marc ug Pau Gasol, Ricky Rubio ug Serge Ibaka.
- Latest
