St. Augustine Cup mosikad karong gabii
CEBU, Philippines – Upat ka teams sa Cebu Schools Athletic Foundation, Inc. (CESAFI) ang magtigi alang sa korona sa 1st Barangay Captain Kirk Bryan Repollo Inter-Collegiate Basketball Tournament-St. Augustine Cup nga mosikad karong alas-7 sa gabii diha sa Inayawan Sports Complex.
Mga entranteng koponan mao ang UC Webmasters, USPF Panthers, CIT-U Wildcats ug USJ-R Jaguars.
Si league commissioner Edwin Dejacto nagkanayon nga ang usa ka semanang torneyo nga gituyo aron pagdugang og lamas sa tinuig nga pista sa Inayawan agi'g pangilin sa mahal nilang patron St. Augustine of Hippo magsubay og single round robin format.
Ang top 2 maoy mag-ilog sa titulo sa tagakay nga duwa, samtang ang laing duha ka teams magsangka alang sa ikatulong dapit.
Ang makampiyon mobulsa og P25,000, samtang ang mopahiluna sa ikaduha ngadto sa ikaupat nga dapit makadawat og P20,000, P15,000 ug P10,000.
- Latest
