Coach Kerr nanghinuklog ugma sa Warriors

CEBU, Philippines – Mikompisal si  Golden State coach Steve Kerr  nga dili lalim ang ilang naagian sa miaging off-season ug gani nasakitan siya sa dili maayong mga panghitabo nga nadangatan sa Warriors.

Nalangkatan nang daan sa ilang korona, nawad-an pa ang Warriors og pipila sa mga bililhon nilang mga players, apil na si Kevin Durant nga tua mitapon sa Brooklyn Nets.

Wala na sab kanila sila si Andre Iguodala, DeMarcus Cousins ug Shaun Livingston.

Hinuon, lig-on pa gihapon ang Warriors gumikan sa presensiya sa Splash Brothers nga sila si Stephen Curry ug Klay Thompson ug ingon man ni Draymond Green. Apan wala  pa'y  klaro kon kanus-a makabalik  og  duwa si Thompson gumikan sa iyang injury.

"This summer was painful in many ways, losing the guys that we did," buhagay pa ni Kerr.

Masaligon hinuon ang three-time champion coach nga gumikan sa pagpabilin sa pipila nila ka mga haligi, makahatag gihapon sila og maayong labok sa umaabot nga NBA season.

"But reassuring, in the sense that we brought back some key guys who are going to help us kind of get to that next era, whatever that looks like,"  dugang  pa  ni  Kerr nga tataw ang gipasabot mao sila si Curry, Thompson ug Green.

Gawas sa tulo, duna pa'y laing bitoon nga ikapanghambog ang Warriors ug kini wa'y lain kondili mao si D'Angelo Russell nga ilang nabunlot gikan sa Nets nga mao na karon ang bag-ong balay ni Durant.

"He's a great young talent and I think he's going to fit right in with our group," matud pa ni Kerr kabahin ni Russell.

Sa pagka karon, ang Warriors nabutang lamang sa ikalimang dapit sa listahan sa mga teams nga lagmit makampiyon sa sunod nga NBA season luyo sa Los Angeles Clippers, Los Angeles Lakers, Houston Rockets ug Utah Jazz.