Partner's Cup finals banatan na

CEBU, Philippines – Hugtanong kumbati ang seguradong masaksihan sa dihang sugdan na sa ARQ Builders-Univerity of the Visayas (UV) Green Lancers ug Southwestern University (SWU)-Phinma Cobras ang ilang "best-of-three" series alang sa kampiyonato sa seniors division sa 2019 Cebu Schools Atheltic Foundation, Inc. (CESAFI) Partner's Cup karong adlawa diha sa Cebu Coliseum.

Mag-abot ang duha ka kampo sa alas-5:30 sa hapon.

Padung sa ilang gubat, ang Lancers ug ang Cobras  parehong nagkupot og 1-1 head-to-head record.

Ang Lancers maoy midaog sa unang nilang engkuwentro, apan bagsik nga panimalos ang gidalit sa Cobras human ilang gipatilaw ang UV sa labing una niining pilde sa iskor nga 77-74  niadtong  Hulyo 25.

Sa dili pa magtigi ang UV ug ang SWU, ang high school finals mosikad sa alas-4 sa hapon.

Ang mga nag-engkuwentro sa semifinals sa juniors division nga gikumbatihan pa samtang sa pagsulat ning balita kagabii mao ang ARQ Builders-UV Baby Lancers batok sa Cebu Landmasters/Sacred Heart School-Ateneo de Cebu (SHS-AdC) Magis Eagles ug ang  University of San Jose-Recoletos (USJ-R) Baby Jaguars batok sa Hotel Fortuna-University of Cebu (UC) Junior Webmasters.

Ang Game-2 sa finals gikatakda karong Domingo, Agosto 4. Ang Game-3, kon gikinahanglan, duwaon karong Lunes, Agosto 5.