Baby Jaguars mitipi sa Baby Cobras

CEBU, Philippines — Nagsalig ang University of San Jose-Recoletos (USJ-R) Baby Jaguars sa maayong salida nilang Kevin Guibao ug Santos Go aron ilubong ang Tough Gear Sportswear/Southwestern University (SWU)-Phinma Baby Cobras, 82-67 sa 2019 Cebu Schools Athletic Foundation, Inc. (CESAFI) Partner's Cup kagahapon diha sa Cebu Coliseum.

Si Guibao mikadlit og 17 puntos, samtang si Santos Go mikulit og 13 puntos alang sa Baby Jaguars nga mipahugot sa ilang pagkupot sa ikaduhang puwesto sa juniors division bitbit ang 5-1 nga baraha sunod sa 6-0 nga ARQ Builders-University of the Visayas (UV) Baby Lancers.

Nalimitahan ngadto lamang sa dos puntos sa nag-unang duha ka kuwarter, si Guibao miposa og 15 puntos sa final half aron ituboy ang Baby Jaguars ngadto sa 15 puntos nga demolisyon sa Southwestern U.

Gikan sa 21-16 nga sugod, ang Baby Jaguars wala na molingi pa sukad miabante og nuybe puntos sa halftime, 41-32 dayon na ngadto sa pagpatilaw sa Baby Cobras sa ikaupat nilang pilde sud sa pito ka duwa.

Si Axel Pasaol maoy nangu sa Baby Cobras uban ang 17 puntos, samtang si Charles Limatog miiskor og 11 sa pilderong Southwestern.