6-0 sweep tumong sa Lancers

CEBU, Philippines – Tinguha sa ARQ Builders-University of the Visayas (UV) Green Lancers nga mokulit og 6-0 sweep sa unang hugna sa eliminasyon sa seniors division sa 2019 Cebu Schools Athletic Foundation, Inc. (CESAFI) Partner's Cup karong adlawa diha sa Cebu Coliseum.

Nagbarog sa dalan sa Lancers mao ang Joemang's Surplus-University of Cebu (UC) Webmasters nga maoy ilang banggaon sa main game sa alas-5 sa hapon.

Ang Lancers ni coach Gary Cortes nagpabiling wa'y pilde sa lima ka duwa, samtang ang Webmasters dunay tulo ka daog nga giatbangan og duha ka pilde.

Sa laing pang duwa sa seniors division, ang Southwestern University (SWU)-Phinma Cobras makigharong sa University of Southern Philippines Foundation (USPF) Panthers sa alas 3:30 sa hapon.

Bitbit ang 4-1 nga baraha, ang Cobras naglaraw nga pahugtan ang ilang pagkupot sa ikaduhang puwesto, samtang ang Panthers mosuway og kulit sa ikatulo nilang daog aron tablahon ang gidaghanon sa ilang pilde.

Sa juniors level, ang Cebu Landmasters/Sacred Heart School-Ateneo de Cebu (SHS-AdC) Magis Eagles makigtigi sa OCCI/Cebu Institute of Technology-University (CIT-U) Wildkittens sa alas-2 sa hapon, samtang ang University of San Jose-Recoletos (USJ-R) Baby Jaguars mohamag sa Tough Gear/SWU-Phinma Baby Cobras sa pasiunang duwa sa alas- 12:30 sa hapon.

Ang Magis Eagles dunay 3-2 record, samtang ang Wildkittens kausa pa lamang midaog sa upat ka duwa. Ang Baby Jaguars nagsolo karon sa ikaduhang dapit sunod sa 6-0 nga UV Baby Lancers  bitbit ang 4-1 nga marka ug ang ilang sangkaon nga Baby Cobras naglukdo og tablang 3-3 record.