Thurman ngadtong Pacman pagbasketbol na lang

CEBU, Philippines – Sa iyang edad, si Manny Pacquiao mas maayo nga mag-basketbol na lang kay sa magpadayon pa og boksing. Mao kini ang labing uwahing labtik ni Keith Thurman, kansang birada ngadtong Pacquiao wa'y hunong nga tataw makapainit og samot sa umaabot nilang away nga gikatakda karong Hulyo 21 (oras dinhi sa Pilipinas) didto sa MGM Grand sa Las Vegas.

Ilogan nilang Pacquiao ug Thurman mao ang unified WBA welterweight title.

Sa dihang nahinabi sa programa nga Face to Face sa Premier Boxing Champion, ang wa'y pildeng si Thurman miinsister nga talisaop na ang karera sa 40-anyos nga si Pacquiao.

Nasayod nga si Pacquiao hilig moduwa og basketbol, gitambagan ni Thurman ang Pinoy ring star nga mas maayo pa og moitsa na lang kini og bola kay sa makigsinukmagay ibabaw sa ring.

Si Thurman manghod og 10 ka tuig ni Pacquiao.

Gipahinumduman sab ni Thurman ang tanan nga siya maoy inilog anang awaya gumikan kay siya maoy "Super" champion sa WBA welterweight division, samtang si Pacquiao regular champion lamang.